" വർഷങ്ങൾ കടന്നു പോകുന്നു. കാലം സമ്മാനിച്ച ഓർമ്മകളുടെ ഉള്ളകങ്ങളിൽ നരവീണു. ഇനിയും ദൂരമേറെ പോകാനുണ്ട്. മടുപ്പില്ലാത്ത യാത്രകൾ അതങ്ങനെ തുടരണം. ഇടയ്ക്കിടെ കാണുന്ന തണലിടങ്ങളിൽ അല്പം വിശ്രമം.
നോവുപാടം കടന്ന്, ആനന്ദോന്മാദിയിൽ ആകാശത്തിന്റെ അങ്ങേയറ്റത്ത് ചെന്നിരിക്കണം. ഉറക്കെ ചിരിക്കണം...
ഈ നിമിഷവും കടന്നു പോകും. ഓർമ്മ പാകിയ ചിന്തകൾക്ക് നടുവിലിരുന്ന് ഓർത്തെടുക്കണം കഴിഞ്ഞ നിമിഷങ്ങൾ... ദിവസങ്ങൾ... മാസങ്ങൾ... വർഷങ്ങൾ...
മൗനമായിരിക്കുക എന്നത് ഏറെ ശ്രമകരവും; അതിലേറെ പ്രിയമുള്ളതുമാകുന്നു. മനോഹരമായ ഇടങ്ങൾ സമ്മാനിക്കുന്ന നിശബ്ദതയിൽ തനിയെ ഇരുന്ന് സ്വപ്നങ്ങൾ കാണണം... ഈ ഭൂമിയുടെ ഓരോ ഇടങ്ങളിലേക്കും മൗനമായി കടന്നു ചെല്ലണം.
കാലമിങ്ങനെ വഴിയറിയാതെ അലയുകയാണ്. ഒപ്പം എങ്ങോട്ടെന്നില്ലാതെ ഞാനും...." ♥️
Amaldevpd@gmail.com
