കടം വാങ്ങിയ പ്രണയം

.....................................


നഗരത്തിരക്കിലെ
നിമിഷവേഗങ്ങളിൽ നിലയുറപ്പിച്ച
എന്റെ നിഴലിനുകൂട്ടായ്,
ഒരു ഔദാര്യംകണക്കെ
എനിക്കു വച്ചുനീട്ടിയ നിന്റെ പ്രണയം;
എനിക്കാവശ്യമില്ല.

പരന്നൊഴുകുന്ന ഈ
ഭൂമിയും ആകാശവുമടക്കം
പ്രപഞ്ചത്തിലെ സർവ്വതിനും
ഞാനൊരു കടക്കാരനാണ്...

ചുട്ടുപൊള്ളുന്ന വെയിലേറ്റ്
അതിന്റെ വേദനയിൽ എന്റെ
ഹൃദയം തിളച്ചുമറിയുന്നത് നീയറിയുന്നെങ്കിൽ,
നിനക്കതിൽ വേദനയുണ്ടെങ്കിൽ;
നിന്റെ തണുത്ത ഹൃദയത്തിൽ നിന്ന്
ഒരുപിടി രക്തമെനിക്ക്
കടമായി പകർന്നുതരണം.
അതെന്റെ ശരീരത്തിൽപ്പടർന്ന്
ശാന്തമാവട്ടെ എന്റെ ഹൃദയം...

കത്തുന്നചൂടിലും
കനംവച്ച മോഹങ്ങളുരുകി
എന്റെ ഹൃദയത്തിന്റെ
മലിനമാകാത്ത ഓടകളിലൂടെ
അലസമൊഴുകിയൊഴുകി നിന്റെ
തണുത്തുമരവിച്ച ഹൃദത്തിലേക്കുള്ള
തടിച്ചഞരമ്പുകളിലൂടെ
ഇളംചൂടുപകർന്ന്
ഞാൻ നിനക്ക് തരും
നീ കടംതന്ന പ്രണയം,
ഒരിറ്റുപോലും ബാക്കിയില്ലാതെ....

പകലിരമ്പങ്ങൾക്കിടയിൽ
തെറ്റിപ്പെയ്ത മഴയിൽ
നഗരവേഗത്തിന്റെ ഇരുണ്ട ഇടനാഴിയിൽ
നമുക്കൊന്നിച്ചിരുന്നു പങ്കുവയ്ക്കാം,
കടംവാങ്ങലുകളുടെ
കവിതകുറിച്ച മുദ്രപത്രങ്ങളിൽ
ഒപ്പുവയ്ക്കാം....


............ അമൽദേവ്.പി.ഡി..........
............ കടം വാങ്ങിയ പ്രണയം.........


amaldevpd@gmail.com