ഉത്തരം

...............

വിണ്ടുകീറിയ പാദങ്ങൾ
നിശ്ചലമായാടുന്നു.
ഉത്തരത്തിലിരുന്നൊരു;
പല്ലി ചിലച്ചു.
പുറത്ത് മഴ തെറ്റിതെറിച്ചു.
സമയമായവന്റെ,
കടമേറിയോൻ,
നല്ലവൻ,
അടക്കം പറച്ചിലുകൾ
അടുക്കളവാതിൽക്കലെത്തി നിന്നു.
മഴയിലലിഞ്ഞ കണ്ണീരുപ്പുകൾ.
അകത്തളത്തിലശ്രുപൊഴിച്ചാരോ....
മഴമാറി,
നാലുപേർ വന്നു
കുളിപ്പിച്ചു, പൊതിഞ്ഞെടുത്തു
ആരോ അവസാന വായ്ക്കരിയിട്ടു.
മഴമറച്ചകണ്ണീർതുള്ളികൾ
തെറ്റിതെളിഞ്ഞ വെയിലിൽ
ഇടറിവീണു.
മഴനനച്ചമണ്ണിൽ
വേരിറങ്ങിയ ജീവിതം തീർത്ത
പുരയുടെ ഉത്തരത്തിൽ
തീർന്നജന്മം.
പുകയമർന്നു
പുലരിതെളിഞ്ഞു
കരിപടർന്ന ചുവരിലമർന്നു
ചിതലരിച്ചൊരുടയോൻ
ചിരിമറന്നുകിടന്നു....


അമൽദേവ് പി. ഡി

amaldevpd@gmaill.com