നിലാവിന്‍റെ ഗന്ധം

____________

മഞ്ഞണിമുറ്റ,ത്തിളവെയിൽ കായുന്ന
മന്ദാരപൂങ്കുയിലേ
മാനം ചുവക്കുന്ന നേരത്തു നിന്നോട്
കിന്നരം ചൊല്ലിയതാര്.
തളിർമുല്ലപ്പടർപിലൊഴുകുന്ന ഗാന്ധർവ
സൗന്ദര്യ പാൽനിലാവിൽ
ചേരുന്ന മുഗ്ദ്ധമാം പ്രണയത്തിൻ ഗന്ധമെൻ
ഹൃദയത്തിൽ പകർന്നതാര്.

നിൻ പ്രേമാഹാരം ചാർത്തിയ നേരത്ത്
ചിരിതൂകി നിന്നവളാരോ,
മധുരമാം നൊമ്പരകാറ്റിന്‍റെ ശ്രുതിയിൽ
മഴയായ് പെയ്തവളാരോ.
മൊഴിയകന്നിന്നൊരു വാടിയപൂവിന്‍റെ
ഇതളായ് മാറിയതെന്തേ
പകരുമെന്നാത്മാവിൻ ഗാനമഞ്ജീരത്തിൽ
മഴവില്ലു തീർക്കുവാനല്ലേ...

പകൽമായുമാർദ്രയാമമ്പിളി  ചൂടുന്ന
നീളും നിശാവേളയിൽ ഞാൻ
തേടുന്നു നിഴലായി നീല നിലാവായി
നീരാടും നിൻ ഗന്ധമെന്നും.
അകലെയെങ്ങോ മാഞ്ഞുപോകും മേഘരാഗമായ്
മഴയായ് പെയ്തൊഴിയുന്നു, വിണ്ണിൽ
വെൺതാരകം നീ കൺതുറന്നു
എന്നും, നിലാവായ് എന്നെ പുണർന്നു...

Photo Courtesy:  Google.

© അമല്‍ദേവ്.പി.ഡി
http://www.facebook.com/amaldevpd
http://mizhipakarppukal.blogspot.com
http://www.facebook.com/blankpage.entekavithakal
www.amaldevpd.simplesite.com
amaldevpd@gmail.com