നിണമൊഴുകിയ പ്രണയരേഖകൾ
__________________________________
ഇനിയുമെത്ര ദിനങ്ങളീ -
ഭൂമിതൻ
മാറിലമരുന്ന
നോവുകളായി നാം,
ഭാരമേറുന്ന
കണ്ണീർകണങ്ങളെ
കാലമറിയാതെ
കാത്തുവയ്ക്കുന്നുവോ .....
നീറുമുന്മാദ
രേണുവിലീറനാം
മൗനരാഗമ -
ലങ്കരിച്ചിന്നലെ,
ഭാവഗായികയായെന്റെ
ജീവനിൽ
പ്രേമഗന്ധം
പരത്തിയതെന്തിന്..... ?
കത്തിയമരുന്ന
ചന്ദനമുട്ടിതൻ
ഗന്ധമാകെപ്പരന്നു,
പാരാകെയായ് ....
ചിത്തഭ്രമം
പിടിച്ചൊരാ ദേഹിതൻ
ചിന്തകളിന്ന്
ചിരിമറന്നീടവേ.
പ്രണയസൂക്തം
വരച്ചിട്ടൊരേടിലായ്
നോവിനാഴ -
മറിയുന്ന വരികളെ
തപ്തരേണുവാൽ
നിറമേകിനീയിന്നു,
നഷ്ടബോധത്തിൻ
നിണരേഖ,തീർത്തുവോ...
എന്തിനായി ,
പ്പിടഞ്ഞുനിന്നാഴങ്ങൾ
ചന്തമറ്റൊരു
സുന്ദരപുഷ്പം പോൽ,
കണ്ണുനീരിൻ
കഥപറഞ്ഞിന്നലെ
പടിയിറങ്ങി നീ
പോകുന്ന നേരത്തു,
ഹൃത്തടത്തിലായ്
നൽകിയ മുറിവിലെ
രക്തമൊഴുകിപ്പരന്നതും
കണ്ടുവോ,.....
കാലമേറെക്കടന്നു -
പോയീവഴി,
വന്നതില്ല
പ്രേമഗന്ധമെൻ ചാരെയായ് .....
...... പി ഡി അമൽദേവ് ......
http://www.Instagram.com/devaragam_pdamaldev
അഭിപ്രായങ്ങളൊന്നുമില്ല:
ഒരു അഭിപ്രായം പോസ്റ്റ് ചെയ്യൂ