മൗനാന്തരം

മൗനാന്തരം
....................


പാതിവെന്ത മനുഷ്യത്വം
ഇപ്പാഴ്മരുഭൂവിതിലൊരിറ്റു,
ദാഹജലം തേടി.
പതിരടർന്ന പദപ്രയോഗങ്ങൾ
പലകുറിയണിഞ്ഞനാവിൽ
പാൽമണം മാറിയിട്ടില്ലെന്നാരും
പാഴ്‌വാക്കായി മൊഴിഞ്ഞിലിതുവരെ.
ഉടലുരുകിയൊഴുകുന്ന-
കണ്ണുനീരിലൊരു മൗനം മിണ്ടാതിരുന്നു.
തൊണ്ടവിണ്ടുകീറി
വേദന,ഹൃദയത്തിൽ തൊട്ടു,
മരിച്ചമനസ്സിലെവിടെ മനുഷ്യത്വം.
കടലാഴമെന്നോണമളന്നെടുത്ത
സ്നേഹവായ്പ്പുകൾ,
നെറുകയിൽചൂടിച്ച ചുംബനപ്പൂക്കൾ
എല്ലാം, ഇടറിയവരികളിൽ
കുറിച്ചിട്ടവൾ...
കരിപടർന്നമുഖത്തിൽ
കിളികൊഞ്ചലകന്നിട്ടില്ല.
മധുരമായിരുന്നു, സ്നേഹമായിരുന്നു.
ഒടുവിലൊരുപെരുമഴയായി
പെയ്തിറങ്ങിയെന്നി-
ലാനന്ദമൊഴുക്കിയപ്പോൾ
മൗനത്തിന്റെ ഇടമുറിയാത്ത നൊമ്പരം
വീണുടയുന്നത് ഞാനറിഞ്ഞു.
പിന്നെയൊഴുകിയതെന്റെ
രക്തമായിരുന്നു...
മതിലുകെട്ടിത്തിരിച്ച
മനുഷ്യമുഖത്തിന്റെ
മറവിനിറഞ്ഞഓർമ്മകളിൽ
അഭിനയരസമറിഞ്ഞു നിന്നു.
'അകലം' ഒരനുഭൂതിയായി
അറിയാതെയെന്നിൽ നിറഞ്ഞിരുന്നു.


.....അമൽദേവ് പി ഡി ........



amaldevpd@gmail.com

നിഴൽചിത്രം

നിഴൽചിത്രം
------------



നിറമകന്ന സൂര്യന്റെ നിഴൽചിത്രമാകാൻ
തപം ചെയ്തുഞാനെന്റെ, പാതിതൻചാരെ...
മഴപ്പക്ഷിപോലെ മനസ്സൊന്നുപെയ്തു
മിഴിക്കുന്പിളിൽ മധുരകാവ്യങ്ങളെയ്തു.

വിരൽത്തുന്പിനാലെ തുന്നിയനൊന്പര-
കാഴ്ച്ചകളെന്നിൽ വെയിൽചില്ലതീർത്തു.
അതിലൊരുവാടിയ ചില്ലയിലേകനായ്
അകലുന്നജീവനെ നോക്കിഞാനിരിന്നു.

കടംതീർത്ത ജീവിതപ്പാതയിലെവിടെയോ
വഴിതെറ്റിവീണ്ടുമെൻ മാനസംതേങ്ങവെ,
നിഴൽഭീതിയെന്നിൽ നിറദീപമായി
കത്തിജ്വലിക്കുന്നു ഹൃദയത്തിനുള്ളിൽ.

ഇവിടെയകലുന്ന നിഴലുകൾ നീഹാരമായ്
ചുറ്റിപ്പിണഞ്ഞെന്റെ കണ്ഠത്തിലമരുന്നു.
സ്നേഹോജ്വലം നിത്യനവയൗവനം പോലെ
സ്വപ്നങ്ങളങ്ങനെയാമങ്ങൾ പുൽകി.

ഒരുസൂര്യനുണരുന്നു രാവിതിൻമേലെ,
പകലെന്നസത്യത്തിൻ പതിരുകൾതേടി-
യലയുന്നോരുജ്വലതീജ്വാലപോലെ
നിഴലൊരുമൗനത്തിൻ തിരശ്ശീലതീർത്തു...

--------------------അമൽദേവ് . പി ഡി----------


http;//www.facebook.com/amaldevpd
amaldevpd@gmail.com

കാത്തിരിപ്പിന്റെ കാലം

കാത്തിരിപ്പിന്റെ കാലം
------------------------


കാലമിങ്ങനെ നടന്നകലുകയാണ്
കനിവുവറ്റിയ
മനസ്സുമായി.
അതിരുകൾപാകിയ
ബന്ധനങ്ങളിൽ നിന്നും
മുക്തിതേടി
ഞാനുമൊപ്പംകൂടി...

കാത്തിരിപ്പിന്റെ
കാലം കൂടിയാണിത്.

വിധിപടർത്തിയ
നോവുകൾക്കപ്പുറം
ചിരിയകന്ന ഒരുമുഖം മാത്രം.
മഴപ്പാടിന്റെ
വേദനകൾക്കൊപ്പം
ഞാനെന്റെ
കണ്ണുനീർ തുള്ളികളെ
മായ്ക്കാൻ
നിന്റെ കരങ്ങളുടെ
സഹായംതേടി...

ഒടുവിലെയാശയതായി
മാഞ്ഞകലുന്ന
നിഴലുകൾ,
ഞാനെന്റെ
കിനാക്കളെ ഉറക്കിക്കെടുത്തി
നിന്നിലേയ്ക്കാഴ്ന്നിറങ്ങി.

നീ നടന്നകന്നവഴികളിൽ
ഞാനാകാല്പാടുകൾ തേടിയലഞ്ഞു.
കാലമൊരശ്രുബിന്ദുവായി
എന്നിലേയ്ക്ക്
പെയ്തിറങ്ങിയപ്പോഴും
ആനന്ദത്തിന്റെ
അതികാലഭാവം
ഞാനറിയുകയായിരുന്നു.


കാത്തിരിപ്പിന്റെ കാലം.
.......................................
അമൽദേവ് .പി.ഡി
.......................................

Photo courtesy google.

Amaldevpd@gmail.com
Http://www.facebook.com/amaldevpd

കഥപറയും മരങ്ങൾ

കഥപറയും മരങ്ങൾ
...................................


മരങ്ങൾക്കുമുണ്ട് കഥപറയാൻ, മുറിവേറ്റ ശിഖിരങ്ങൾ പൊഴിച്ച കണ്ണീർ പൂക്കളുടെ കഥ. കാടുകയറിയ ചിന്തകൾക്കൊപ്പം മുറിവേല്പിച്ച മനുഷ്യനഖങ്ങളുടെ കാരുണ്യമകന്ന കാഴ്ച്ചകളുടെ കഥ.

കാലങ്ങൾ, പെയ്ത മഴയും കൊണ്ട വെയിലും മറക്കില്ല. എന്റെ ഉൾത്തുടിപ്പുകളിൽ മഴുവെറിഞ്ഞ കൈകളെ മാപ്പ്. എന്റെ രക്തമൂറ്റി മഴയായി നിന്റെ ദാഹമകറ്റിയപ്പോഴും നീയറിഞ്ഞില്ല നിന്റെ നാളെകൾ നിനക്കന്യമാകുകയാണെന്ന്.

ഇനിയുമീവഴി കൈകളിൽ മഴുവുമേന്തി മനുഷ്യമണം നടന്നു പോകും. അവന്റെ ചിന്തകളിൽ വിടർന്ന മണിമാളികകൾ, അതിനായവനെന്റെയടിവേരുകൾ ഒന്നൊന്നായി മുറിച്ചുമാറ്റും. ആത്മാവിനേറ്റ മുറിവിന്റെ വേദനസഹിച്ച് ഞാനീമണ്ണിലടർന്നുവീഴും. എന്റെയുടലിനെ നിങ്ങളുയർത്തി കൊണ്ടുപോകും, എന്റെ ശിഖിരങ്ങൾ കൈകൾ ഇവിടെ ബാക്കിയാകും...

" എരിയുന്ന വേനലിൽ ചുടുവേരു തേടി
ഒരു മഴുവിന്നു പറന്നുവന്നു.
മധുരമില്ല പ്രേമം കിനിയുന്ന തണലുമില്ല
കിളികളില്ല ഹൃദയത്തിൽ സ്നേഹമില്ല
നിഴലുകൾ നിഴലുകൾ ഞങ്ങളിന്നു,
മഴപ്പാടുംതേടി നോക്കി നിന്നു."

" അപ്പോഴൊക്കെ ഞാനും നീയുമടങ്ങുന്ന ജന്മങ്ങൾ വെറും നീരുവറ്റിയ തോലുകൾ മാത്രം. "

കലാന്തരങ്ങളായി ഞാനിവിടെ നിൽക്കുന്നു, എന്റെ സഹോദരങ്ങളെ വെട്ടിവീഴ്ത്തിയ നന്മമടങ്ങിയ മനുഷ്യവംശത്തെകുറിച്ചോർത്ത് പരിതപിക്കുകയല്ലാതെ ഞങ്ങൾക്കെന്തു ചെയ്യാൻ കഴിയും. നിങ്ങൾ ഇല്ലാതാക്കുന്നത് നിങ്ങളുടെ തന്നെ ജന്മത്തെ തന്നെയാണ്. നിങ്ങളുടെ ഭാവിയെയാണ്. നിങ്ങളുടെ നീതിയെയാണ്.

അറിയുക അവസാനിക്കുന്നില്ല ഒരു ജന്മവും, ഞാനും നീയും ഈ പ്രപഞ്ചത്തിന്റെ സർവ്വസൃഷ്ടികളും പുനർജനിക്കും. അതാണ് പ്രപഞ്ചനീതി. പ്രപഞ്ചധർമ്മം. അന്ന് നീയൊരുമരമായിരിക്കും. ഞാനൊരു പക്ഷിയോ, മൃഗമോ, മനുഷ്യനോ ആയിരിക്കാം...

നിന്റെ ശിഖിരത്തിൽ പക്ഷിയായിരിക്കുന്ന ഞാൻ കൂടുകെട്ടും. നിന്നിലുള്ള എന്റെ വിശ്വാസമാണ് അത്.

നിന്റെ തണലിൽ മൃഗമായഞാൻ വിശ്രമിക്കും. നിന്നിലുള്ള വിശ്വാസമാണ് അത്.

നിന്റെ ശിഖിരങ്ങളെ നിന്റെ ദേഹത്തെ കണ്ട മനുഷ്യനായ ഞാൻ എന്തു ചെയ്യണം, ഇന്നു നീയെന്റെ തലമുറയോട് ചെയ്തപോലെ ഞാനും മഴുവെറിയട്ടെ, നിന്റെ കണ്ണീരിന് വിലയിടട്ടെ....

"മതിലുകൾക്കിരുവശത്തായി രണ്ടു കണ്ണുകൾ, ചിതലെടുത്ത സ്വപ്നങ്ങളുടെ ചിരിവറ്റിയ നേർസാക്ഷ്യം.... ഒട്ടുദൂരം നടക്കാനുണ്ട്, ഇനിയും ഈ പാതയോരത്ത് തണൽ വിരിക്കാൻ ഒരു വാകമരമായി ഞാൻ ജനിക്കും. അതിൽ നിറയെ ചുവന്ന വാകപ്പൂക്കളുണ്ടാകും. ഒരു പൂവ് നിനക്കുള്ളതാണ്. നിനക്കായി പൊഴിച്ച ആ പൂവെടുത്ത് നിത്യതയുടെ വെള്ളിനൂലിഴകൾ പാകിയ ചക്രവാളസീമയിലേയ്ക്ക് നടക്കണം. അവിടെ ചോരപുരണ്ടകീറത്തുണിയിൽ പൊതിഞ്ഞുകെട്ടിയ രണ്ടു കൈകളുണ്ടാകും, നീയരിഞ്ഞുവീഴ്ത്തിയ എന്റെ ശിഖിരങ്ങളാണ്. നിന്റെ പ്രേമോപഹാരമായി ആ വാകപ്പൂവ് എന്റെ കൈകളിലേയ്ക്ക് വയ്ക്കാം. "



കഥപറയും മരങ്ങൾ.... അമൽദേവ്.പി.ഡി...........


Amaldevpd@gmail.com
Http://www.facebook.com/amaldevpd
Http://www.youtube.com/amaldevpd

ചിറക് 1

ചിറക് 1

"അകകാമ്പുകളില്ലാത്ത നോവലിന്റെ നിറംകെട്ട പുറംചട്ടയായി അവരുടെ ദാർഷ്ട്യം ഒരഭംഗിയായി നിലകൊള്ളുന്നു. അതിരുകൾ കെട്ടിത്തിരിച്ച് സ്വയംഭാവത്തിൽ ആനന്ദം കണ്ടെത്തുന്ന ഇവരുടെ കൈകൾ എന്നും ബന്ധനത്തിലാണെന്ന സത്യം അവരറിയാതെ പോകുന്നു."

' ചിലരങ്ങനെയാണ്. ഇതെന്റെ സാമ്രാജ്യമാണ് എന്റെ വഴികളാണ് എന്റെ ചിന്തകളും എന്റെ തീരുമാനങ്ങളുമാണ്... തുടർച്ചയായി സ്വന്തമഹത്തെ ബോധ്യപ്പെടുത്താൻ മറ്റുള്ളവരോട് ഞാനെന്ന ഭാവത്തെ പുകഴ്ത്തിപ്പുകഴ്ത്തി മണ്ണടിയുന്നു. വിട്ടുവീഴ്ച്ചകൾ വിധിയുടെ പാഴ് വേലകളാണെന്ന് കല്പിച്ച് കാലത്തിന് മേൽ കാരിരുമ്പിന്റെ ശക്തിയേറിയ വാക്കുകളെറിഞ്ഞ് സ്വയം നാറുന്നു. ചിലരങ്ങനെയാണ്...'

വെറും പുറംചട്ട മാത്രമാകും അവർ. ഒരു ബ്ലാങ്ക് പേജ്. ഒന്നുമില്ലാത്ത ജീവിതം. ഇതും ഒരു ജീവിതമാണെന്ന് കരുതിക്കൂട്ടി പറഞ്ഞൊപ്പിക്കാൻ പ്രയാസപ്പെടും. പെട്ടന്നുള്ള ദേഷ്യപ്രകടനങ്ങൾ, മുൻകോപങ്ങൾ, കളിയാക്കലുകൾ എല്ലാം ഇവരുടെ സ്വഭാവസവിശേഷതകൾ. പറയണമെന്നുണ്ടാകില്ലെങ്കിലും നിസ്സാരകാര്യങ്ങളെ ചുറ്റി'നൂറുനാവിന്റെ നുണക്കഥകളുണ്ടാകും വിളമ്പാൻ. കേട്ടിരിക്കുന്നവന്റെ മാനസികനില തകർക്കുന്ന വിലകുറഞ്ഞ വാക്പ്പോരുകൾ. ചിലതെല്ലാം അവിടെയും വിധിയുടെ വിദൂരക്കാഴ്ച്ചകളായി അവശേഷിക്കുന്നു.

എന്തിനായിരുന്നു ഞാൻ എന്റെ യാത്ര തുടങ്ങിയത്. ?
ഇപ്പോഴും തുടങ്ങിയിടത്ത് തന്നെ നിൽക്കുന്നതെന്തിന്. ?
ഒട്ടേറെ മുഖങ്ങൾ കണ്ടു. വിവിധങ്ങളായ നിഴലുകൾ...



തുടരും.........

Amaldevpd@gmail.com

കടൽ തീരങ്ങൾ താണ്ടി....

കടലിന്റെ ആഴങ്ങളിൽ നിറയെ മുത്തുകൾ ഉണ്ടെന്ന്...!
നല്ല തിളക്കമുള്ള നീലവർണ്ണമുള്ള മുത്തുകൾ...🙂
അവളുടെ മിഴികളിൽ ആ മുത്തെടുക്കാനുള്ള മോഹമാണ്...🤗🤗
തിരകൾ ഇടയ്ക്കിടയ്ക്ക് അവയെ ഈ മണൽപരപ്പിലേയ്ക്ക് കൊണ്ടുവരും...😍
ഞാനത്തെടുത്ത് അവൾക്ക് കൊടുക്കും...🙂
അപ്പോൾ അവൾ ചിരിക്കും...😊😊😊
സ്നേഹമൂറുന്ന മധുരമുള്ള ചിരി... ❤️❤️❤️

cc

conta

എന്നന്പിളിപ്പൂവിനെ കാണാൻ....

മാനത്ത് പൂത്തൊരാ...അന്പിളിപ്പൂവിനെ...
കാണുവാൻ ഞാനാ... തോണിയേറിപോയി....
( മാനത്ത് പൂത്തൊരാ... )

ഓളപ്പരപ്പിലെ താളമായി,
എന്റെ മോഹങ്ങൾ
തുഴയെറിഞ്ഞെങ്ങോപോയി...
( മാനത്ത് പൂത്തൊരാ... )

കായലിനറ്റത്ത് കവിതകുറുക്കുന്ന...
കായലിനറ്റത്ത് കവിതകുറുക്കുന്ന
കരിനീലകണ്ണുള്ള പെണ്ണിന്റെ
കിളിക്കൊഞ്ചൽ കേട്ടു... ഞാൻ...
അവിടെയന്നേരം എത്തിയപ്പോൾ എന്തേ...
ചിരിമണിമുത്തുകൾ ചിരിച്ചുടഞ്ഞു...
അവളുടെ ചിരിമണിമുത്തുകൾ ചിരിച്ചുടഞ്ഞു...
( മാനത്ത് പൂത്തൊരാ... )

രാത്രിതൻ ശീതളഛായയിലവളോരു,
ചാരുമുഖിയായി തെളിഞ്ഞു നിന്നു
എന്റെ അന്പിളി പൂവായി വിടർന്നു നിന്നു...

നീലനിഴൽ വീണ കായൽക്കരയിൽ...
നിദ്രമറന്നു ഞങ്ങൾ പാടിയപാട്ടുകൾ
ആരും കൊതിക്കുന്ന,
ഹൃദ്യമാം പ്രേമത്തിൻ നൂലിഴ പാകിയ നേരം
അവളൊരു ദേവതയായി ഇറങ്ങി വന്നു...
എന്നുള്ളിൽ... നിലാമഴയായി പെയ്‌തിറങ്ങി....

( മാനത്ത് പൂത്തൊരാ... )


contact:    amaldevpd@gmail.com
follow my blog:  http://www.mizhipakarppukal.blogspot.in